Azərbaycan musiqisi dünyada tanılır, sevilir. Amma əlbətdə ki, musiqimizi tanıdan alətlərimiz, musiqçilərimiz də var. Milli musiqi alətimiz tarın sədası dünyanı fəth edib.

Rüfət Həsənov həyatının 20 ilini tara həsr edib. Azərbaycan musiqisini Türkiyədə, Türkmənistanda, ABŞ-da, Yunanıstanda təmsil edib. Bu gün isə heç yerdə yox, elə dogma Azərbaycanda tara öz töhfəsini verir. Deyir, tar onun həyatının böyük bir hissəsini təşkil edir. Ümumiyyətlə, musiqiyə maraq isə onda ailədən yaranıb. Atası həvəskar nağara ifaçısı olub. Daha sonra övladlarını professional musiqiyə gəlmələri üçün həvəsləndirib. Bacısı fortepianoya maraq göstərən Rüfət müəllimin, qardaşı isə dünyaşöhrətli kamança ifaçısı İmamyar Həsənovdur. Rüfət müəllim isə atasının arzusu ilə tarı seçib.

"20 ildir professional səhnədəyəm. Amma bir 25 il olar ki, mən tarda ifa edirəm. Bu, artıq mənim bir hissəmə çevrilib. Necə insanın bir ailə üzvü olursa, tar da mənim üçün elədir. Mənim üçün ilk öncə tar aldındı, hələ heç məktəbə getmirdim. Yavaş-yavaş o simləri vura vura hiss elədim ki, məndə tara aid nəsə var" - deyir Rüfət Həsənov.

Bir müddət Milli Konservatoriyada, daha sonra müxtəlif musiqi mərkəzlərində  dərs deyən tarzən hazırda 36 nömrəli musiqi məktəbində gələcəyin tarzənlərinə bu musiqi alətinin sirrlərini aşılayır. Tələbələri onun dərslərində həvəslə iştirak edirlər. Ən balaca tələbəsinin adı isə Əlidir. O,birinci sinifdə oxuyur.

Tarın günümüzdəki nailiyyətlərindən, dünyada qazandığı şöhrətdən də danışan tarzən deyir ki: - "Tarın UNESCO-nun mədəni irs siyahısına daxil edilməsi heç də təsadüfi və yaxud təəccüblü deyil. Məndən öncə sənətkarlar da, mənə də qismət olub ki,bir çox ölkələrdə tarı təmsil edək. Və düşünürəm ki, bunun nəticələridir ki, tarın təmsili tarı dünya səviyyəsinə çıxardı".