Mədəniyyət Nazirliyi tərəfindən “Qarabağ – mədəniyyətimizin beşiyi” adlı layihəsi davam edir. Növbəti material Üzeyir Hacıbəylinin Şuşadakı ev-muzeyinə həsr olunub.

Ermənistanın Azərbaycana qarşı təcavüzü nəticəsində işğal edilmiş ərazilərdə tarixi abidələr, memarlıq nümunələri dağıdılıb və talan edilib. Qarabağdakı zəngin irsimiz saxtalaşdırmaya və mənimsənilməyə məruz qalıb. Bu həqiqətlərin beynəlxalq səviyyədə ictimailəşdirilməsi üçün Mədəniyyət Nazirliyinin təşkil etdiyi “Qarabağ – mədəniyyətimizin beşiyi” adlı layihə davam edir. Növbəti material isə Üzeyir Hacıbəylinin Şuşadakı ev-muzeyinə həsr olunub. 1959-cu ildə Şuşada dahi Azərbaycan bəstəkarı, milli peşəkar musiqimizin banisi Üzeyir Hacıbəylinin uşaqlıq illərini keçirdiyi evdə onun ev-muzeyi yaradılıb. Muzeyin ekspozisiyasında bəstəkarın ilk yaradıcılıq illərinə aid əşyalar, əsərlərinin əlyazmaları, çoxlu sənəd, həyat və yaradıcılığını əks etdirən fotoşəkillər nümayiş etdirilib, Üzeyir Hacıbəylinin anadan olmasının ildönümləri, yubileyləri dövlət səviyyəsində qeyd olunub. 1985-ci ildə Üzeyir Hacıbəylinin 100 illik yubileyi UNESCO tərəfindən geniş qeyd edilib. Şuşa şəhərinin erməni təcavüzkarları tərəfindən işğalından sonra muzeyin fəaliyyəti dayandırılıb və eksponatları Üzeyir Hacıbəylinin Bakıdakı ev-muzeyinin fondlarında saxlanılırdı. Lakin bu gün Üzeyir bəyin ruhu şaddır. Ona görə ki, Müzəffər Azərbaycan Ordusu bəstəkarın boya-başa çatdığı, qürur rəmzimiz Şuşanı bu il noyabrın 8-də işğaldan azad etdi.