60-cı illərin təlatümlü hərəkatları, mədəni inqilablar fonunda  tarixin 4 məşhur siması görüşür... Mayamidə bir gecə baş tutan bu görüşdə sosial xaosun əsas problemləri müzakirə olunur... 

Məhəmməd Əli kimi tanınan boksçu Kassius Kley, hüquq müdafiəçisi Malkolm X, məşhur müğənni Sem Kuk və peşəkar futbolçu Cim Braun... Bu dörd əfsanəvi şəxsiyyət 1964-cü ilin fevralında bir otel otağında görüşür. Görüşün nəticəsini bilmək üçün isə “Mayamidə bir gecə” filmini izləmək lazımdır. Rejissor Recina Kinqin Venesiya Film Festivalında mükafata layiq görülən yeni filmi yazıçı Kemp Pauersin debüt pyesi əsasında ekranlaşdırılıb. Kinoda Mayamidə bir fevral gecəsi görüşən 4 dostun düşüncələri, fəaliyyətləri, sosial və siyasi məsələlərə baxış bucaqları maraqlı rakursdan işıqlandırılıb. 22 yaşlı Kassius Kley ağır çəkidə dünya çempionluğu adını qazanmasını kiçik bir otel otağında ən yaxın dostları – Malkolm Sem və Cimlə bilrikdə qeyd edir. Dünya üçün bu 4 nəfər əfsanə olsalar da, kiçik bir otaqda onlar sadəcə dövranı dəyişməyə çalışan gənclərdirlər. İnsan hüquqlarının pozulduğu, sosial və siyasi çəkişmələrin tüğyan etdiyi bir dövrdə dörd ikona, dörd müasir fikirli gənc yeni dünya yaratmaq iddiasındadır....

Büdcəsi 17 milyon dollar təşkil edən 110 dəqiqəlik “Mayamidə bir gecə” filmi dekabrın 25-dən etibarən böyük ekranlarda nümayiş olunacaq.