ADA Universiteti tələbələr arasında “Ukrayna-Azərbaycan diplomatik münasibətləri” mövzusunda Ümumukrayna esse müsabiqəsi keçirəcəyini elan edib. Oktyabrın 25-dən noyabrın 25-dək keçiriləcək müsabiqənin qalibi ADA Universiteti adından Bakıya dəvət olunacaq, 2-10-cu yerləri tutan iştirakçıları mükafatlar gözləyir.
Müsabiqə Taras Şevçenko adına Kiyev Milli Universitetinin Beynəlxalq Münasibətlər İnstitutunun dəstəyi ilə keçirilir. Müsabiqənin Ukrayna tərəfindən kuratoru ictimai xadim, Bakı Beynəlxalq Multikulturalizm Mərkəzinin Ukraynadakı nümayəndəsi Marina Qonçaruk olacaq.
Taras Şevçenko adına Kiyev Milli Universitetinin Beynəlxalq Münasibətlər İnstitutunun direktoru, siyasi elmlər doktoru, professor Valeri Kopeyka bildirib ki, bu müsabiqə diplomatiya sahəsində mütəxəssislər yetişdirilməsi sahəsində ölkələrimiz arasında əməkdaşlıq üçün böyük əhəmiyyət kəsb edir. V. Kopeyka deyib: “Tamamilə əminəm ki, Azərbaycan və Ukrayna təhsil, mədəniyyət sahələrində və humanitar sahədə birgə layihələrdə bundan sonra da davamlı və səmərəli ikitərəfli münasibətlər quracaqlar. Ümidvarıq ki, ADA Universiteti ilə gələcək əməkdaşlığımız da səmərəli olacaq”.
ADA Universitetinin prorektoru Fariz İsmayılzadə bu müsabiqəni yüksək qiymətləndirib, həmçinin bildirib ki, müsabiqənin keçirilməsində Ukraynalı gənclər Azərbaycan, eləcə də, Ukrayna-Azərbaycan münasibətləri haqqında daha çox bilgi əldə edəcəklər. “Düşünürəm ki, bu cür ikitərəfli layihələrin təşkili bizim dostluq və qardaşlıq münasibətlərini daha da gücləndirəcək. Müsabiqənin qalibini mədəniyyətimiz, tariximiz və ümumilikdə ölkəmizlə daha yaxından tanış olmaq üçün Bakıya dəvət edəcəyik. Biz gələcəkdə də əməkdaşlığa və digər ölkələrin gəncləri arasında Azərbaycan haqqında bilgiləri artıracaq oxşar müsabiqələrin təşkilinə şad olarıq”, deyə Fariz İsmayılzadə vurğulayıb.
Müsabiqənin kuratoru Marina Qonçaruk deyib: “Ukraynalı tələbələr təhsil sahəsində Ukrayna-Azərbaycan birgə layihələrinə xüsusi diqqət yetirirlər. Azərbaycan bizim gənclər üçün çox mühüm və perspektivli istiqamətdir. Buna sübut kimi qeyd edim ki, bizim dövlət universitetlərində Azərbaycan dili, Azərbaycan mədəniyyəti və tarixi profil fənlər kimi öyrənilir. Məsələn, Taras Şevçenko adına Kiyev Milli Universitetində və Kiyev Milli Linqvistika Universitetində bu fənlər profil fənlər kimi öyrənilir. Qarşıdakı müsabiqə Ukraynanın bütün guşələrindən olan tələbələrə Ukrayna-Azərbaycan münasibətləri barədə daha çox bilik əldə etmək və müsabiqə tapşırığının yerinə yetirilməsinə yaradıcı şəkildə yanaşmaq imkanı verəcək”.
Müsabiqə çərçivəsində Ukrayna-Azərbaycan diplomatik münasibətlərinə dair onlayn mühazirələr və tələbələrlə görüşlər keçiriləcək. Müsabiqədə bir neçə min ukraynalı tələbənin iştirak edəcəyi gözlənilir.
